Innvandrerkvinnene svømmer vidare

- Ingen hadde erfaring med svømming frå før, og nokre av dei hadde aldri vore i vatn før. No kan fleire av dei både svømme og flyte på rygg, opplyser Mary Høvring, friviljug frå nettverket "Kvinner møter Kvinner" i Randaberg.

Svømmetreninga for innvandrerkvinnene i bygda starta opp etter eit samarbeid mellom Randaberg kommune og nettverket "Kvinner møter kvinner". Målet var ganske greit: å lære innvandrerkvinnene å svømme.

- Ingen grenser
No har 12 av innvandrerkvinnene tatt steget over til Randaberghallen, der dei kan trene vidare i basseng kvar einaste fredag. Treningstimen kom i stand etter at Randaberghallen fant ledig treningstid, samstundes med at Randaberg helselag gjekk inn som sponsor ved å betale inngangspengane for deltakarane.

- Svømmetrening er sosialt, og det er eit godt samhald med mykje latter og glede. Mange av dei same damene har også lært å sykle det siste halvåret, så no ser dei ingen grenser for kva som er mogeleg heretter, avsluttar Mary Høvring.