Utstyrslager for barn og unge

- Vi treng både pent brukt ulltøy, yttertøy og treningstøy/sko til fritidsaktivitetar, seier Irene Vika Jaatun i avdeling Fritid i Randaberg kommune, som saman med Hilde K. Hebnes og Bente Monica Reilstad i Barn og familie har starta opp den nye utstyrsordninga.

Onsdag 23. oktober, mellom kl 17 - 19, kan du levere tøy og skor til Frivilligsentralen i Landsbyhuset - eller bruke ein av dei grøne konteinarane som er plassert ut i Randaberghallen og Randaberg Arena. 

- Det er kostbart å kjøpe nytt tøy og skor når borna deltar i ulike aktivitetar, samstundes som borna veks seg større i løpet av ein sesong. Det er difor mange foreldre som kan dra seg nytte av vårt utstyrslager.

- Gav meirsmak
- I sommar tok vi turen innom Randaberg Arena for å sjekke mengda tøy som var lagt att etter treningsaktivitet. Mengda vi fant her, og responsen vi fekk i etterkant ved utdeling, gav meirsmak for å starte opp utstyrslageret, seier Irene Vika Jaatun.

Dei startar no ei systematisk innsamling. 

- Jobbsentralen vasker og sorterer tøyet og skorne før dei blir levert ut til dei som treng det mest. Jobbsentralen sine brukarar får difor naudsynt jobbtrening, og barn og unge i bygda kan få nytt, gratis tøy eller sko. Med andre ord ein vinn-vinn-situasjon, avsluttar Irene Vika Jaatun.  

Har du spørsmål om ordninga, eller treng utstyr, kan du kontakte Irene Vika Jaatun på telefon 957 65 452.