Samarbeid om kreft

Eldbjørg Sande Spanne er tilsett i 50 prosent stilling som kreftkoordinator i Randaberg. Storparten av lønnsmidlane til stillinga blir dekt av Kreftforeninga. I alt har foreninga gjeve midlar til 97 kreftkoordinatorstillingar i 147 kommunar i heile landet.

- Det var mange kommunar som søkte om midler til kreftkoordinator, men berre tre kommunar i Sør Rogaland fekk midler til ei slik stilling; Sandnes, Hå og Randaberg, seier Eldbjørg Sande Spanne.

Kva er ein kreftkoordinator?
Koordinatoren skal vere til hjelp for å legge til rette kvardagen for kreftsjuke og deira pårørande på ein best mogeleg måte, samordne tilbod og tenester rundt kreftpasientane i kommunen og medverke til gode rutiner og system for kreftomsorg i kommunane.

- Det kan ofte vere vanskeleg å finne fram til der ein kan få hjelp. Koordinatoren kan hjelpe til med å henvise vidare til rett instans. Det kan blant anna handle om rettar du har som kreftsjuk, ernæring, bivirkninger og fysisk aktivitet. Har ein i tillegg barn, kan det vere vanskeleg å vite kva du skal fortelle vidare, seier Eldbjørg Sande Spanne.

- Ei stor boble
- Mange kreftsjuke opplever at dei er i ei stor boble, og veit verken ut eller inn. Då kan det være godt å ha nokon å snakke med. Det er ikkje alltid ein har fått med seg god nok informasjon, og ein kan bli uroleg av alt som har skjedd.

I tillegg til å arbeide som kreftkoordinator i 50 prosent stilling, er Eldbjørg Sande Spanne tilsett som kommunal kreftsjukepleiar i halv stilling.

- Primært arbeider eg som koordinator mandag til onsdag og annankvar torsdag, men kan nåast på telefon kvar dag. Eg skal vere tilgjengeleg for kreftpasientar i alle faser, frå nydiagnostisert til alvorleg sjuk, men eg er også open for spørsmål frå andre, seier Eldbjørg Sande Spanne.

Det er per i dag to andre sjukepleiarar i kommunen som tar vidareutdanning i kreftsjukepleie og palliasjon (lindrande behandling).

- I tillegg har vi fire hjelpepleiarar med vidareutdanning i palliasjon. Det er svært bra i ein sopass liten kommune som vi er, avsluttar Eldbjørg Sande Spanne.

Det er utarbeida ei brosjyre som fortel meir om kva koordinatorstillinga inneber. Sjå den nye brosjyra her.